நீ தொறக்காட்டி போடா – ஆப்கன் இந்தியா வான்வழி வர்த்தகப் பாதை

நம்முடைய அண்டை நாடு நம் மீது போரைத் திணித்தது. அதே நேரத்தில் இந்தியாவோ, நமக்கு பார்லிமெண்ட் கட்டிடம் கட்டித்தந்தது. அணை கட்டித் தந்தது. நம்முடைய மாணவர்கள் பலர் இந்திய கல்லூரிகளில் ஊக்கத்தொகையுடன் கூடிய படிப்பை மேற்கொண்டு வருகிறார்கள். ஒரு நிலையான, படித்த மக்களால் முன்னேடுக்கப்படும் அண்டை நாட்டையே இந்தியா விரும்புகிறது என்பது இதன் மூலம் தெளிவாகிறது

இவ்வாறு சொல்கிறது ஆப்கன் டைம்ஸ் பத்திரிகையின் தலையங்கம்.

இந்தியா ஆப்கனுடன் வர்த்தகம் செய்ய சண்டைக்காரன் வீட்டைத் தாண்டித்தான் போகவேண்டி இருக்கிறது. ஆப்கனுக்கு வேறு பிரச்சினை. எதையாவது ஏற்றுமதி செய்யவேண்டும் என்றால் பாகிஸ்தானின் கராச்சி துறைமுகத்தை நம்பி உள்ளது. பாகிஸ்தான் வழியாக இந்தியாவிற்குப் பொருட்கள் அனுப்ப கெடுபிடிகளுடன் அனுமதி தரும். ஆனால் இந்தியாவிலிருந்து எந்தப் பொருட்களையும் இறக்குமதி செய்ய அனுமதி இல்லை. சரக்கை இறக்கிவிட்டு வெறும் லாரியைத்தான் ஓட்டி வரவேண்டும்.

போதாக்குறைக்கு பாகிஸ்தான்-ஆப்கன் வாய்க்கால் தகறாறு (எல்லைப் பிரச்சினை) அவ்வப்போது ஏற்பட்டு, பாகிஸ்தானிகள் சுத்தமாக கதவைப் பூட்டி விடுகிறார்கள். ஏற்றுமதியை அனுமதிப்பதில்லை. எனவே ஏற்றுமதி செய்ய இயலாமல் பழங்கள் மற்றும் பிற பொருட்கள் அழுகிப் போய்விடுகின்றன என்று ஆப்கன் விவசாயிகள் விசனப்படுகிறார்கள்.

‘நீ தொறக்காட்டி போடா..’ என்று சரக்குகள் airlift செய்யப்பட்டுவிட்டன. போன திங்கட்கிழமை, 60 டன் சரக்குகளை சரக்கு விமானத்தில் ஏற்றி டெல்லிக்கு அனுப்பிவிட்டார் ஆப்கன் அதிபர் கானி. அதை விமான நிலையத்திற்குச் சென்று பெற்றுக்கொண்டார் சுஷ்மா. அதில் வந்த பெருங்காயம் இந்தியாவில் விற்றுத் தீரும் முன்னர் போனவாரம் இரண்டாவது விமானம் கந்தஹாரிலிருந்து உலர் பழங்களை ஏற்றிக் கொண்டு டெல்லி வந்தது. காலணிகள், மருந்துப் பெட்டிகளை ஏற்றிக்கொண்டு திரும்பப் பறந்துவிட்டது.

நான்கு நாட்களுக்கு முன்னர் வெளி வந்திருக்கும், ஆப்கன் தூதரின் பேட்டி ஒன்றை வாசித்தேன். பாகிஸ்தானின் இந்தத் தடையால் ஆப்கனுக்கும் இந்தியாவிற்கும் நட்டமாகும் என்று நினைத்தார்கள். ஆனால் யார் தடைவிதிக்கிறார்களோ அவர்கள்தான் பாதிக்கப்படுவார்கள் என்று கடாசி இருக்கிறார்.

எப்படி என்று பார்த்தால் –
ஆப்கன்-பாகிஸ்தான் வர்த்தகத்துடன் ஒப்பிட்டால் ஆப்கன்-இந்திய வர்த்தகம் ஒன்றுமே இல்லை. பாகிஸ்தானுடன் ஆண்டுக்கு 5பில்லியன் அளவிற்கு கொடுக்கல் வாங்கல் செய்யும் ஆப்கன், இந்தியாவுடன் 700மில்லியன் வரைதான் வர்த்தகம் செய்கிறது. ஆனால் இந்தத் தடையின் காரணமாக, ஆப்கன்-பாக் வர்த்தகம் 27சதம் வரை பாதிக்கப்பட்டுள்ளதாக சொல்கிறார். அது இந்தியாவுடனான ஒட்டு மொத்த வர்த்தகத்தைப் போல இரு பங்கு! அவ்வளவு பெரிய நட்டம் சாதாரணமாகத் தெரிகிறதா பாகிஸ்தானுக்கு? ஒரு பொது அறிவு வேண்டாமா என்று கொந்தளிக்கிறார்கள் ஆப்கன் வாசிகள்

https://twitter.com/USAIDAfghan/status/879202653208797185

ஈரானில் இந்தியா கட்டிக்கொண்டிருக்கும் சபஹார் துறைமுகம் வழியாக அடுத்தடுத்த வியாபார வழிகளும் தேடப்படுகின்றன. இந்த சபஹாருக்கும், பாகிஸ்தானில் சீனா கட்டும் க்வதார் துறைமுகத்திற்கும் ஒன்ன தொலைவு வெறும் 72 கிமீ. கப்பல் துறையில் உள்ளவர்களுக்கு அருகருகே உள்ள துறைமுகங்களால் வரும் இழப்புகள் தெரியும்.

சபஹாரில் முதலீடு செய்ய ஜப்பானுக்கும் அழைப்பு விடுத்திருக்கிறார்கள். ஜப்பான்-இந்தியா-ஆப்கன்-ஈரான் என்று இது ஒரு ரெயின்போ கூட்டணி.

வரவேற்பு இருந்தால் அடுத்தடுத்த நகரங்கள் கந்தஹார், ஜலாலா பாத், மாஷார்-ஈ-ஷெரீஃப் நகரங்களும் அமிர்தசரஸ், மும்பை, குஜராத் உடன் இணைக்கும் வாய்ப்புகள் உள்ளன.

இந்தத் திட்டத்தை சீனா விமர்சித்துள்ளது. சிபிஈசியில் எதிர்க்க இந்தியாவும் இதில் ஆர்வம் காட்டுகிறது. மக்களுக்குப் பயன்படும் திட்டம் எதுவோ அது வெற்றி பெறும்!

வளர்க பாரதம்!